تحت المطر والوطن شعبه من أحلامي
أبيع كبريت ذكرى في شوارعنا
هنا سكبنا الفرح في كاسنا الظامي
وهنا شربنا مرارة كاس واقعنا
وهنا حكم قاضي الحرمان بإعدامي
وهنا اخذنا من القسوة ملامحنا
هنا عطيت الوعد ما يكشف لثامي
وهنا انكشف كل وجه كان يخدعنا
هنا التقيتك وحبك ثورة إلهامي
طفلين واحساسنا المجنون ثالثنا
اذكرك تشتاق أنا أرقص وانت قدامي
ترسم على الرمل بعض من شقاوتنا
وافرح اذا قلت لي يا طفلتي نامي
زندي وساده وعين الصبح موعدنا
سوالف الحي كانت تحبس أقدامي
والصوت ما يرفعه الا جوامعنا
كم من مدينه بنوها من ثرى حطامي
يا ليتهم قدّروا تربة مواجعنا
يا سيدي والوطن بصمه من إبهامي
لو خاننا وش هو العذر لأصابعنا
ولو كاس الأحلام يجرح شفّة صيامي
كان أقضي العمر في حانة مدامعنا
شوف المطر صار خوف لتربة أيامي
وكبريت حلمي طفى من جور شارعنا