كلّ ممكن زهدته في رجا المستحيل
قلت آباطول نجمة ما حد طالها
يقنع القلّ من عزمه بروحه قليل
الحرار إتضايـق من ردى حالها
لا تململ ترا بال المفارق طويل
والليالي عجاف يا وسـع بالها
علّمتني على طول المدى والرحيل
أضحك إنّ شالت الأحزان موّالها
حسبي الله على وقتي ونعم الوكيل
ظلّ يستـدرج الأحلام وأغتالها
ما بقى تمر لو هزيّت عذق النخيل
إقطفتها السنيـن وماتت آمالها
ملّت العيس حاديها يحطّ ويشيل
ودّها تستريح وترمي أثقالها
وجد حالي وأنا حالي بليّا نحيل
وجد من محتمي له كلمةٍ قالهـا
يومّ دنّ الشمال وهبّت الريح هيل
لين روحي بغت تقضي على جالهـا
إيييه ياللي مثل قلب الزمان البخيل
جادك الدمع وعيوني وغربالها
غصنك اللي مع أنفاس الحكاوي يميل
ما ترك عدله إلاّ ميّـل أحمالها
شاعرك مؤمن إنّ الوصل ماله سبيل
لكنّ الروح ما هو راضي إذلالها
كان في حاله وفاله وطبعه ثقيل
لكن الناس تكذب ما هي بفالها
كان ممكن أكون وكنت مالي مثيل
تشبه الناس بعض وواجد أمثالها
لو لصوتي مع العالم شبيه وبديل
كان خلّيت الأنفس تلبس أسمالها