والله ان النفس ماهي طيبه والبال ضايق
والضماير كنها مما بداخلها حريقه
ان وجدتك يالصديق اللي على صدري موايق
تختفي فجأه ولا احصل على وصلك طريقه
والحقايق مؤلمه لوجيت اعدك يالحقايق
وين من يقدر يساعدني لياقلت الحقيقه
والشماته ما تغير من مفاهيم الخلايق
لازم نبقي علاقتنا مع العالم وثيقه
لو نظرنا للشباب وما يواجه من عوايق
ندري ان الوقت محسوب ن عليهم بالدقيقه
الولد لوفاق من ديمومته ماهوب فايق
شاطحه عينه بجواله يدردش مع صديقه
من تخرج مالقى غير الشوارع والحدايق
وكلما زاد الطفش زود على صوت الموسيقه
والابو يهجم عليه الضغط من شتى الطرايق
لين حمل من حمول الدين حمل ن مايطيقه
وعاش هايم والغنايم بين متملق وبايق
والمطبل مع نجومه والمشجع مع فريقه
وحال الام ادهى وامر وجوها ماهوب رايق
جل من يرمي عليها اللوم نيران ن صديقه
هم طفل وهم بيت وهم شغاله وسايق
والضروف تحدها والسوق يجذبها بريقه
والتناحر بالنسا موجود لو كانن شقايق
تمتلي غيره ليا شافت رفيقتها رشيقة
وان تجاهلنا الحقايق وضعنا ماهوب لايق
ذاك تشفقله من التخمه وذا مافك ريقه
ورد بستاني رحيقه عن جميع الورد فايق
الله اكبر ويش يحرم نحل بستاني رحيقه