الليل والخاطر الضايق على هونه
ورى هجوس تبي تارد على الجمه
بغيت اكب الشعر للي يقولونه
مير امتلأ الصدر ضيق وقلت له يمّه
يازين نظم القصيد وجرّة لحونه
للي سواتي حزين ومحترق دمه
ظروف الأيام جباره وملعونه
والقلب ماعاد له طاقه على همه
بالله ويش الصبر ياللي تعرفونه
لا ذقت طعمه ولا أشوفه ولا أشمه
اصارع الواقع اللي ثارت جنونه
اسرّحه بالفرح ويضوّي مطمه
تهتز منها ظلوع الصدر وركونه
وتسقّط اللي على القمه من القمه
أشد حيلي واقول الصعب ياهونه
وليا أظلم الليل غرّق مدمعي كمه
ياوجه ربي على وضعي وياعونه!
ويا وسع صدري عليه إبرأ للذمّه
يا اخوي ليتك تشوف الحال وشلونه
كني صغيرٍ توفى أبوه بعد أمه
عقب الذي صار حالي وش تسمونه
ياللي تعرف الاسم سمّه لنا سمّه