لو التويتر يزف النفحةالعطره،
والله لأغرد بريح المسك والكادي
وعبير وردٍ عليه من الندا قطره،
واكتب عليها صباح الخير يابلادي
يبلاد الامجاد من قطره الى قطره
على خطى الصافنات العيس والحادي
يا حادي العيس ردد مجدنا واطره
صف التبر واصقله من سيرة اجدادي
احيان سر النجاح مغامره خطره
واحيان سر الفشل من كد وجهادِ
الرزق ما تحكمه قوه ولا شطره
مكتوب رزقي قبل تاريخ ميلادي
ياما بصمتي كبود اعداي منفطره
ياما بنطقي ملكت قلوب حسادي
والشاعر اللي يجي شعره على الفطره
تطرب له السمع ويغرد له الشادي
تشوف الابداع في حرف ملا سطره
نظرات شعره ثلاثيات الابعادي
ارم الكسل وابد فالغيث اوله قطره
بالبذل واستلهم العبره من البادي
ما يهلك الرجل ويذله سوا بطره
ما عنده مجيب لوّ يصيح وينادي
ولا يرفع الرجل غير السيره العطره
يبقى شذاها بريح المسك والكادي